L-aġenziji deċentralizzati tal-UE jwettqu kompiti tekniċi, xjentifiċi jew maniġerjali li jgħinu lill-istituzzjonijiet tal-UE jfasslu u jimplimentaw il-politiki.

Huma jappoġġjaw ukoll il-kooperazzjoni bejn l-UE, il-gvernijiet nazzjonali, u s-sħab soċjali billi jiġbru flimkien l-għarfien espert tekniku u speċjalizzat.

L-aġenziji deċentralizzati jitwaqqfu għal perjodu indefinit u huma mifruxa mal-UE kollha. Kull aġenzija hija unika u għandha r-rwol tagħha stess.

Il-Kummissjoni Ewropea taħdem flimkien mal-ħames aġenziji deċentralizzati tal-UE li ġejjin fil-qasam tal-impjiegi, l-affarijiet soċjali u l-inklużjoni:

• L-Awtorità Ewropea tax-Xogħol (ELA) tiżgura li r-regoli tal-UE dwar il-mobbiltà tal-forza tax-xogħol u l-koordinazzjoni tas-sigurtà soċjali jiġu infurzati b’mod ġust u effettiv. Tgħin ukoll lill-awtoritajiet nazzjonali jikkooperaw biex jinfurzaw dawn ir-regoli, u tagħmilha aktar faċli għaċ-ċittadini u n-negozji biex jibbenefikaw mis-suq intern.
• Il-Fondazzjoni Ewropea għat-Titjib tal-Kondizzjonijiet tal-Ħajja u tax-Xogħol (Eurofound) tipprovdi u xxerred għarfien importanti dwar kwistjonijiet soċjali u relatati max-xogħol u biex tikkontribwixxi għal politiki sodi u bbażati fuq l-elementi konkreti f’dawk l-oqsma.
• L-Aġenzija Ewropea għas-Sigurtà u s-Saħħa fuq il-Post tax-Xogħol (EU-OSHA) impenjata biex l-Ewropa ssir żona tax-xogħol aktar sikura, aktar f’saħħitha u aktar produttiva. Pereżempju, tidentifika u tivvaluta riskji ġodda u emerġenti fuq il-post tax-xogħol.
• Iċ-Ċentru Ewropew għall-Iżvilupp ta' Taħriġ Vokazzjonali (Cedefop) jappoġġja l-iżvilupp ta’ politiki Ewropej dwar l-edukazzjoni u t-taħriġ vokazzjonali u t-taħriġ fis-servizz u jikkontribwixxi għall-implimentazzjoni tagħhom.
• Il-Fondazzjoni Ewropea għat-Taħriġ (ETF) tgħin lill-pajjiżi fi tranżizzjoni u lill-pajjiżi li qed jiżviluppaw biex jisfruttaw il-potenzjal tal-kapital uman tagħhom permezz tar-riforma tal-edukazzjoni, it-taħriġ u s-sistemi tas-suq tax-xogħol fil-kuntest tal-politika tar-relazzjonijiet esterni tal-UE.