Is tionscadal é an Pas Eorpach Slándála Sóisialta (ESSPASS) atá ceaptha chun go mbeidh sé níos éasca do dhaoine a gcearta slándála sóisialta a fheidhmiú agus iad i dtír Eorpach eile. Tá an tionscnamh sin mar chuid de Phlean Gníomhaíochta um Cholún Eorpach na gCeart Sóisialta.

Le ESSPASS, díreofar ar an méid seo a leanas:

• an próiseas a dhigitiú maidir le doiciméid teidlíochta a iarraidh agus agus a fháil, i.e. ‘doiciméid inaistrithe’, cuir i gcás an Cárta Eorpach um Árachas Sláinte (EHIC), chun go mbeidh sé níos áisiúla d’úsáideoirí
• fíorú fíor-ama: Le ESSPASS, tabharfar isteach córais fíor-ama chun a fhíorú go tapa thar theorainneacha an bhfuil na doiciméid dhigiteacha sin bailí nó ar tháinig athrú orthu

Sineirgí le tionscnaimh de chuid an Aontais atá ann cheana

Déanann ESSPASS forbairt ar thionscnaimh dhigiteacha de chuid an Aontais atá ann cheana, lena n-áirítear:

• An Creat Eorpach um Chéannacht Dhigiteach (EUDI)
• Rialachán an Aontais Eorpaigh maidir le ‘Tairseach Aonair Dhigiteach’
• Bonneagar Eorpach um Sheirbhísí Blochshlabhra

Na príomhghnéithe atá beartaithe le ESSPASS

• tiachóg chaighdeánach na céannachta digití (an tiachóg EUDI a bheidh ann amach anseo): a bheidh le húsáid ag saoránaigh chun doiciméid dhigiteacha infhíoraithe a stóráil agus a chomhroinnt
• Fíorú digiteach fíor-ama: is féidir le hinstitiúidí slándála sóisialta, le cigireachtaí saothair, le soláthraithe cúraim sláinte, agus le heintitis ábhartha eile na doiciméid sin a fhíorú láithreach bonn ar fud na hEorpa
• rialú sonraí pearsanta: tá smacht iomlán ag daoine ar a gcuid sonraí pearsanta

Cás úsáide samplach le haghaidh ESSPASS

Is iad sin na céimeanna a d’fhéadfadh an t-úsáideoir a ghlacadh chun rochtain a fháil ar chóir leighis gan choinne i dtír eile:

An tsaoire a phleanáil

Sula dtéann sé ar saoire go dtí tír eile, is féidir leis an duine leagan digiteach a fháil den Chárta Eorpach um Árachas Sláinte (EHIC). Chun é sin a dhéanamh, is féidir leo an méid seo a leanas a dhéanamh:

1. cuairt a thabhairt ar shuíomh gréasáin ‘Your Europe’
2. an t-atreorú a leanúint chuig an tairseach náisiúnta chun iarratas a dhéanamh

EHIC digiteach a eisiúint

1. Eisíonn soláthraí árachais sláinte EHIC digiteach
2. Déanann an duine an doiciméad a íoslódáil agus a stóráil ina thiachóg dhigiteach

EHIC a thaispeáint tar éis gortú i dtír eile

1. Agus iad ar saoire, tá timpiste ag an duine agus iarrtar air EHIC a thaispeáint san ospidéal
2. Is féidir leis an duine EHIC digiteach a thaispeáint ina thiachóg dhigiteach san ospidéal

Amlíne

 2021 go dtí 2022  

An chéad chéim de ghníomhaíochtaí píolótacha ESSPASS a seoladh le Istituto Nazionale della Previdenza Sociale san Iodáil le rannpháirtíocht ó 13 thír eile. Díriú ar nósanna imeachta don doiciméad iniompartha A1.  

2023 go dtí 2025 

Dhá chuibhreannas d’institiúidí Bhallstáit an Aontais (Dintiúir Dhigiteacha don Eoraip C4EU agus Vector) a dhéanfaidh píolótú ar eisiúint agus ar fhíorú an deimhnithe A1 agus an Chárta Eorpaigh um Árachas Sláinte, le tacaíocht airgeadais ón gCoimisiún.

2025 agus ina dhiaidh sin

Bunaithe ar thorthaí na dtionscadal píolótach, déanfaidh an Coimisiún cinneadh maidir leis na chéad chéimeanna eile, lena n-áirítear an fhéidearthacht ESSPASS a chur in úsáid ar fud na hEorpa agus an mbeadh creat reachtach nua ag teastáil chuige sin.

Ceisteanna agus Freagraí

Seo a leanas gach eolas is gá a bheith agat faoin bPas Eorpach Slándála Sóisialta (ESSPASS).